O 14 de febreiro rematou a campaña Moaña: 21 días en galego. Tivemos que esperar unhas semanas pero por fin chegou o noso premio. Quen acadou o reto de manter a lingua 21 días levou como premio unha camiseta con deseño de orixe que inaugurará a nova colección SonDe Moda promovida pola arca moañesa Afouta e o grupo NAO Galiza, na que se conxuga a moda e amúsica galega nun mesmo elemento. O deseño foi un segredo ata os últimos días da campaña.
DINAMIZACIÓN LINGÜÍSTICA
26/2/21
Remata a campaña Moaña: 21 días en galego
DEBUXAMOS INSPIRÁNDONOS EN ROSALÍA
Co galo da celebración do Día de Rosalía de Castro, o alumnado de primeiro e segundo encheron o corredor do primeiro andar con debuxos inspirados na nosa escritora máis célebre.
Así pois, en primeiro decidiron facer retratos de Rosalía inspirándose na canción "Rosalía pequeniña", e aínda que aparecen Rosalías de todos os tipos, sen dúbida algunha a que triunfou foi a "Rosalía pirata".
En segundo a inspiración veu dada polo poema "Adiós ríos, adiós fontes" e a partir do mesmo realizaron uns cadros preciosos cheos de cor e formas.
Noraboa polo traballo rapazada!!
24/2/21
FELIZ DÍA DE ROSALÍA!
O 24 de febreiro celebramos o nacemento da nosa escritora máis célebre: Rosalía de Castro. Este ano quixemos homenaxeala poñendo música aos seus poemas máis coñecidos e a verdade é que non podemos estar máis orgullosos do gran traballo que fixemos!
O alumnado de Infantil, 1º e 2º de Primaria cantaron a célebre canción de Uxía "Rosalía pequeniña".
O curso de 3º de Primaria animouse a cantar o poema "Maio longo".
A rapazada de 4º de Primaria tamén nos deleitou cantando o poema "Has de cantar" dende a radio.
O alumnado de 5º e 6º animouse a subir á radio a rapear “Adiós ríos, adiós fontes” e “Negra sombra”.
23/2/21
CELEBRAMOS O ENTROIDO!
Aquí vos deixamos unha pequena mostra da celebración do día do Entroido no noso cole. Como xa vén sendo tradición, cada curso cantou a murga que creou na súa clase. Este ano, como non podía ser doutra maneira, o tema máis comentado foi a nosa vivencia co Covid-19. Os maiores do cole ademais construíron un "coronameco", leron o seu testamento e todos asistimos á súa queima.
Esperamos que vos guste!
22/2/21
A RECICLAXE NO ENTROIDO!
Se algo estamos aprendendo este curso co noso proxecto é que podemos facer infinidade de cousas bonitas a partir da reciclaxe. No vídeo recóllese unha pequena mostra da imaxinación do noso alumnado xunto coas súas familias para traer ao colexio todo tipo de accesorios durante a semana do Entroido.
Os taboleiros do Pinterest para inspirarvos non se achegan ás marabillas que atoparedes no vídeo!
18/2/21
DÍA INTERNACIONAL DA MULLER E A NENA NA CIENCIA
O día 11 de febreiro celébrase o Día Internacional da Muller e a Nena na Ciencia.
Este día foi proclamado no 2015 pola Asemblea Xeral das Nacións Unidas co fin de conseguir o acceso e a participación total e equitativa na ciencia para as mulleres e as nenas, e ademais para lograr a igualdade de xénero e o seu empoderamento.
Cómpre lembrar que a ciencia e a igualdade de xénero son vitais para acadar os ODS incluídos na Axenda 2030.
O noso alumnado participou nas charlas de mulleres científicas que o Faro de Vigo ofreceu aos centros participantes nos proxectos do Faro da escola. A través da plataforma Zoom puideron coñecer a Marta López, Luísa Martínez e Eva Balsa-Canto, científicas do CSIC que lles explicaron como foron as súas carreiras e como son as súas vidas de científicas, ademais de moitas cousiñas interesantes. Tamén tiveron a oportunidade de facerlles preguntas e así poder saber máis acerca do mundo científico feminino.
A continuación recóllense as lecturas que Searín seleccionou para este día, así coma un vídeo que explica moi ben a súa importancia.
15/2/21
21 días en galego: dicionarios da clase de segundo
Tomando como punto de partida o material sobre a palabra do día compartido polos nosos compañeiros do CEIP Plurilingüe de Tirán, na clase de 2º E.P., traballaron unha palabra en galego cada día e elaboraron os seus propios dicionarios.
NO MORE MATILDAS
Co galo do Día da Muller e a Nena na Ciencia, o alumnado de 6º subiu á radio para explicarnos que significa o hashtag #Nomorematildas.
13/2/21
DÍA MUNDIAL DA RADIO
Hoxe, 13 de febreiro, é o Día Mundial da Radio e o alumnado de valores de 2º pareceulle que era o día indicado para publicar as súas ideas para mellorar o planeta que foron gravar á Radio Seara. A radio ten o poder de comunicar e de chegar a un número moi grande de persoas e iso é o que as crianzas de segundo queren: que todos poidades escoitar as súas ideas e consellos para que entre todos poidamos facer mellor as cousiñas seguindo a aprendizaxe do noso PDI.
E ti? Anímaste a levar a cabo as súas indicacións?
Bo traballo, rapaces/as!!
11/2/21
ITINERARIOS LECTORES: OS MEGATOXOS
O alumnado de sexto está inmerso na lectura do libro "Os Megatoxos e o aprendiz de druída" do escritor Anxo Fariña. Gustoulles tanto que decidiron realizar ilustracións da obra en distintos soportes: lousa, papel ou lenzo, e así poder expoñelas na nosa biblioteca acompañando ao libro. Incluso gravaron un vídeo coa representación dun anaco da obra que sen dúbida vos animará a ler o libro!
Hai que ver que artistas tan grandes temos no noso cole! Parabéns polo traballo e grazas por compartilo con todos nós!!
8/2/21
NOVOS LIBROS NA NOSA BIBLIO
O noso estante de novidades está ateigado de libros que foron chegando á biblioteca recentemente. Cómics, poesía, álbums ilustrados...estanvos esperando para poder acompañarvos nas próximas lecturas. E ti...por cal vas comezar?
5/2/21
ENTROIDO 2021 EN SEARA
4/2/21
O 1º CARANVEXORNAL DO CURSO XA ESTÁ AQUÍ!
Xa está aquí o 1º caranvexornal deste curso e non podemos estar máis contentos de poder ver o seu resultado! Nel podedes atopar un montón de noticias relacionadas co funcionamento do cole este curso tan estraño para todos e todas nós, aprender a canción das "Mans limpiñas", ver entrevistas en directo ou saber máis sobre os Obxectivos de Desenvolvemento Sostible que forman parte do noso PDI "Camiñando cara o 2030".
Desfrutádeo!!
1/2/21
FELIZ DÍA DA PAZ!
Este curso, seguindo as directrices do PDI "Camiñando cara o 2030", polo Día da Paz realizamos unha coreografía onde o plástico foi o principal protagonista e instrumento musical para acompañarnos. Co alumnado de Infantil no centro do campo tirando diferentes envases nunha rede mariña exposta no chan, quixemos simbolizar o perigo que sofren os nosos océanos. Coa música que o compositor Carl Orff creou para os poemas medievais "Carmina Burana" o alumnado de primaria conseguiu expresar e representar a guerra dos plásticos á que nos enfrontamos nos nosos días e á que debemos poñer fin canto antes.
Noraboa polo gran traballo que fixestes todas e todos!!
O mundo de Inho
Enmarcado na campaña de 21 días en galego, o alumnado de 6º E.P. participou neste obradoiro desenvolvido por AGAL (Asociación Galega da Lingua) que ten por obxectivo amosarlles aos alumnos e alumnas diferentes chaves culturais do mundo lusófono.
Este son algúns dos materiais empregados para o seu desenvolvemento. En 6º quedaron encantados, están desexando repetir no instituto.